Human Resources

كل علامة حتي لو فيها شيء سلبي بعتبره طوبه اتبنت في سلم النجاح 💪 من ٣سنين كنت بحاول اطلع من حيز الدلتا في مجال الموارد البشرية عشان عارفة أن الشركات الأم كلها في القاهرة و اني مجرد بمسك فروع و التطور في المجال بطئ وفهمت التوظيف عاملة ازاي و طبيعة الشركات و ايه التخصصات اللي سهل الاقيها و الوظائف المستحيلة كانت تجربة ممتعة و بفهمها أكثر كل ما ازيد خبرة 👌 كنت بعمل مقابلات كتيرة جدا و بترفض  عندي فترة فراغ في ال cv تخصصي في الدراسة كان آداب آثار يعني عاملة career shift كان معايا HR certificate from AUC بس لوحدها مش كفاية وسنتين خبرة في الدلتا كل ده نتيجته في النهاية إني في المكان اللي كنت عاوزاه و مش بس كده  بدأت اترجم كل تجربة فشلت فيها لخطوات تتعالج ازاي  يمكن لما بكتب بوست أو اصور فيديو انا بقول الكلام ده لنفس زي ما بقوله للآخرين ..  و هو عبارة عن وجهة نظري اللي صلحتها بعد تجارب كتير و تدوير كتير عالصح فين ... فأعذروني اني مش محترفة تصوير أو كلامي مترتب اوي  بس الأكيد اني بعمل مجهود عشان أطلع بأفضل نتيجة أقدر عليها دلوقتي ❤️🌸 #ayamegahed

اولا كده الموضوع طويل فاللي معندوش دماغ يقرأ ميقراش من الاول :D :D  ..................... اتنين اصحاب بيدخلوا شركة سوا واحد فيهم صاحب الفكرة و التاني صاحب رأس المال و كتبوا العقد و اتفقوا علي دور كل واحد فيهم .. بعد فترة صاحب الفكرة اختفي تماما و بعت مرسال انه انسحب و مش عايز يكمل لظروف خارجة عن ارادته .. صاحب رأس المال كان اتحمس للفكرة و ابتدي المشروع بالفعل و المشروع كان بردو اكبر من امكانياته بس هو متحمس للفكرة فكمل و عافر لحد ما وصل انه طور اكتر بفكرة المشروع و دخل منه ارباح كتير نتيجة تعبه و مجهودة .. بعد فترة صاحب الفكرة عرف النتيجة اللي توصل ليها المشروع .. بقي كل شوية يتواصل مع صحبه و يفكره انه صاحب فضل عليه عشان دي فكرته لحد ما التواصل زاد و بقي تدخل غير منطقي .. هنا بقي بقي بيجور علي حق مش من حقه لا و كمان عايز يشاركه بدون وجه حق !!! بالظبط كده زي جحا اللي باع بيته و سايب فيه مسمار كل شوية يدخل البيت عشان مسمار !!!  للاسف ده مش بيحصل بس في الشراكة و المعاملات التجارية ده بيحصل في حياتنا كلها و بيوصلنا لمضايقة ان الواحد خايف علي تعبه و مجهوده وواحد بيهدد و بيتطفل علي ...

و اخيرا إجازة بعد أيام امتحانات و تجربة جديدة في اول ترم  كان لازم أكون جاهزة بدري شوية عن كده بس ملحوقة أن شاء الله 🙏 بعد أيام طويلة بين محاولة التوفيق بين اكتر من عمل و أكتر من دراسة  أيا إن كانت النتيجة فهي أسعدتني و ضافت ليا كتير اوي.  ارتاح يومين و مستعدة للشغل أن شاء الرحمن علي أكمل وجه بكل طاقة إيجابية و انجازات توقعتها بنفسي لنفسي 😍 من خلال تجربتي مع الجامعة للمرة التانيه نفسي اقول لأي حد لسه بيختار تخصصة  *افتح تفكيرك علي تقبل التجارب  *ادرس مشروع الدراسه مرة و اتنين  *اوعي تخاف لان الخوف أكتر شيء ممكن يعطل ابداعك  * حافظ علي روح الحماس اللي جواك  *طموحك هيتحقق مع الوقت طول ما انت مؤمن بيه *وقت الراحة مهم . * انت جاي الحياة تعيش و تفرح متخليش اي شيء سلبي يسحب من طاقتك .  بس كده و نتقابل الأحد أن شاء الله مع معارك و تجارب جديدة أن شاء الله 😍😍😍 #ayamegahed

النهارده أصعب يوم قابلته من ساعة ما اشتغلت في مجال الموارد البشرية.. عملت مقابلة لشاب عنده 26 سنه خريج أكاديمية النيل قسم تجارة نظم و معلومات ..  الشاب ده اسمه كمال .. من واقع شغلي اللي فات في نداء عارفه أن ضعيف السمع عنده موهبه أكبر من اني أقول عليه معاق ..  كمال ده ضعيف سمع من و هو طفل .. لابس سماعات .. و بيتكلم كويس جدا .. جاي يقدم على وظيفة عامل خدمات .. بس كمال اسم على مسمى ربنا ييسر لك امورك. و كل شغله اللي فات على مدار سنتين او تلاته من لما كان في الكليه بردو بيشتغل عامل .. الشغل مش عيب و لا هو حاجه نتكثف منها .. قلتله مدورتش ليه؟! على حاجه في مجالك .. بيقولي محدش بيرضي يشغلني .. انا مقدرتش حتي أأعده مع مديره المباشر عشان يشوف يقبله أو لاء .. حسيت انه هقلل من قيمته لو شغلناه و هقلل من قيمته لو المدير رفضه .. بجد حرام يعني شاب متعلم و واعي يشتغل عامل ميلاقيش شغلانه تكرمه يقدر يعيش منها ! لا و كمان اللي الاماكن اللي كان فيها الشغل اكتر من ٨ساعات و مسؤول عن مخزن مصنع بحاله في النظافه يوميا ! #ضعيف_السمع_مش_معاق  أكرموا شبابنا خلي في مكان لكل واحد حسب عقليته و طموحه ...

الجانب الإيجابي من دخول سوق العمل في سن أكبر .👌 طبعا من المتعارف عليه أن ديما مفضل أننا نبدأ تحديات سوق العمل بعد الدراسة الجامعية إن مكنش أثناءها فخلينا نبرز بعض الأمور الإيجابية في المرشحين المتقدمين علي وظائف fresh graduate و هما متخرجين من كذا سنة 🤷 1- هتلاقيه عنده توازن عند تلقي الصدامات و قادر أنه يستوعب صراعات بيئة العمل و يتعامل معاها. 2- قدرته على الاستيعاب والفهم كبيرة جدا خصوصا لو حد اشتغل كتير علي نفسه و اطلع كتير في فترة الفراغ . 3- هتلاقي فيه حتة التطور السريع و عايز يلحق نفسه و يتعلم بسرعه و يكتسب أكبر كم من المعلومات في أقل وقت. 4- مش هيضيع الفرص المتاحة بالنسبة له هيحاول يغتنمها قدر الإمكان. 5- قدرته علي الملاحظة و التحليل هتكون أكبر بحكم تقدمه في السن و مواجهة تقلبات الحياة. 6- هيكون عارف بيقول الحاجة المناسبة في الوقت المناسب. 7- تحمل المسؤولية بالنسبة ليه هيكون أعلي بحكم خبراته في الحياة. ** دي مجرد وجهه نظر طبعا بدون تعميم علي كل المرشحين و لكن أكيد فيهم الموهوبين يستحقوا الفرص فعلا و احنا دورنا  ندعمهم. #ayamegahed