فرص ‏العمل ‏في ‏الاقاليم

السلام عليكم ورحمه الله وبركاته... 

بخصوص الفرص في المنصوره و انها قليله و كتير بيقولوا أنها منعدمة ... و بالواسطة و أن علي مستوي المحافظة.. مفيش فرص 

بصوا يا جماعه انا متفهمه صعوبة الموقف و عارفه حرب الكفاءات عندنا .. خصوصا أن المنصورة بلد للناس المتميزين الموهوبين فعلا .. و كتير منهم اللي بيطلع بيشرفنا حقيقي في تخصصه .. 

مفيش حاجه اسمها مفيش فرص .. 

مفيش حاجه اسمها الشغل مستحيل .. 

انت اللي بتختار طريقك هيمشي ازاي... 

انا ليا تجربة حقيقية في المنصوره من شغل لتدوير علي شغل .. 

١- كنت بشتغل علي نفسي و بتعلم لغة و بشوف كورسات اون لاين و باخد كورسات حقيقية . 

٢- وقت ما كنت بدور علي شغل في تخصصي HR و رغم ظروف شخصية صعبه .. شيلت من دماغي كلمة مستحيل .. تابعت كل الصفحات و المواقع حتي الشركات الام في القاهرة عشان فروعها اللي بتفتحها هنا و كنت بقدم .. 

٣- ٢٤ ساعة حرفيا كنت بتابع و كنت انام اقوم اعمل سيرش علي جوجل و يطلع صفحات غريبه اول مرة اشوفها بتنزل شغل و كنت بفتح alarm ..

4- صفحات الفيسبوك لشغل المنصورة كلها و موقع أسمه تنقيب لدرجة كمان كنت أتابع علي olx اي حاجه بتنزل شغل كنت عامله اكونت عليها أو متابعه .. 

٥- بدأت اهتم ب لينكد ان و افتحه بشكل يومي زي الفيسبوك  و اتابع .. 

لحد ما عملت اكتر من ٢٥ مقابله منهم شركات ماتعرفش يعني ايه HR .. 

لحد ما ربنا اكرمني بفرصه من حيث لا احتسب كنت بعتت في اعلان طالب اصلا شئون اداريه مش HR و الحمد لله اشتغلت معاهم شؤون عاملين لمدة سنة و نص و ربنا كرمني بعدها بفرص احسن لتخصصي .. فالاحسن ... 

و بعدين ربنا اكرمني بشغل بالقاهرة .. 

اللي فاكر بقي أن فرص القاهره اسهل و بيعينوا اي حد انتو تبقوا غالطانين الموضوع مش كده .. 

مش اي مكان هيناسبك أو انت هتكون مناسب .. 

هتشتغل علي نفسك كتير اوي اكتر مما تتخيل لغة و مهارات كمبيوتر و مهارات عمليه لحد ما تكون فعلا مناسب .. 

انا عملت في المنصوره اكتر من ٢٥ مقابله و في القاهره لحد ما لاقيت مكان يناسبني و اتناسب معاه عملت اكتر من ١٠٠ مقابله بدون مبالغه 🤷

الموضوع متوقف علي حاجتين ايمانك بقدراتك و السعي 

#ayamegahed